Tiċħad mandat ieħor tal-Ministeru tal-Edukazzjoni
Il-Union of Professional Educators (UPE) għal darb’oħra reġgħet ingħatat raġun mill-Qorti. Il-Prim Awla tal-Qorti Ċivili presjeduta mill-Onor Imħallef Audrey Demicoli ċaħdet mandat ta’ inibizzjoni li l-Ministeru u d-Dipartiment tal-Edukazzjoni fetħu kontriha u għalhekk ikkonfermat id-dritt tal-UPE li tagħti dawn id-direttivi. Għaldaqstant mil-lum stess dawn id-direttivi jerġgħu jidħlu fis-seħħ minħabba nuqqas sħiħ ta’ rieda mill-gvern li jidħol fi djalogu soċjali mal-UPE biex isolvi t-tilwim pendenti.
Fid-dawl ta’ din l-aħħar sentenza, il-UPE tfakkar illi ilha żmien twil tisħaq illi l-Gvern adotta politika ta’ repressjoni u diskriminazzjoni fil-konfront tagħha. Biss biss, il-UPE tosserva illi l-gvern fetaħ ammont rekord ta mandati ta’ inibizzjoni kontriha, liema mandati kollha ġew miċħuda mill-Qorti. Apparti minn hekk, il-ministeru u dipartiment tal-edukazzjoni ġew misjuba diversi drabi li għamlu improper discrimination mal-UPE u l-membri tagħha mill-Uffiċju tal-Kummissarju tal-Edukazzjoni fi ħdan l-Uffiċju tal-Ombudsman.
Fir-rigward ta’ dan kollu, il-UPE tisħaq illi l-Ministeru tal-Edukazzjoni irid ċaħħad lill-UPE u l-membri tagħha mid-drittijiet fundamentali ta’ assoċjazzjoni ħielsa u ta’ libertà ta’ espressjoni. Dan ma jixraqx lil gvern li jiftaħar li jrid ikun l-ewwel fl-Ewropa fid-drittijiet ċivili imma imbagħad juża kull mezz biex ifixkel il-ħidma ta’ waħda mill-akbar trade unions fil-pajjiż.
Għaldaqstant il-UPE tikkundanna il-politika totalitarja tal-gvern u tal-Ministeru tal-Edukazzjoni fir-rigward tagħha. Minflok ma jirrispetta d-dritt tal-għażla tal-edukaturi, il-gvern qiegħed isostni monopolju trejdunjonistiku għax ma jemminx fid-djalogu soċjali u jrid biss rubberstamp trade unions. Il-gvern għandu jieqaf jaħli flus il-poplu f’mandati u azzjonijiet ritaljatorji minflok juża l-enerġija tiegħu biex jwettaq djalogu soċjali effettiv u jagħti rappreżentanza xierqa lill-edukaturi li għażlu lill-UPE bħala t-trade union tagħhom. Safrattant, ħafna skejjel tal-gvern huma fi stat diżastruż, uħud minnhom b’soqfa joqtru u oħrajn mgħarrqin fl-ewwel ilma tax-xita.
Iċ-ċaħda ta’ dan l-aħħar mandat huwa konferma oħra illi l-UPE għandha raġun fil-missjoni tagħha u jagħtiha aktar kuraġġ biex tassigura rappreżentazzjoni xierqa lill-edukaturi msieħba fiha.
Matul il-proċeduri tal-mandat il-UPE kienet irrapreżentata mill-Avukati Dr Jason Azzopardi, Dr Kris Busietta u Dr Alessandro Farrugia.
